قواعد التشطيب العشرون
قواعد التشطيب العشرون من جزر
لو هشتطب شقتك قريب ومحتار تبدأ منين أو تعرف حد هيشطب وعاوز تساعده
جزر بيقدملك 20 نصيحة من خلاصة خبراتنا تاخد بالك منهم قبل ما تبدأ
1. أول وأهم قرر يوفرلك في الميزانية إنك تحدد تقسيمة شقتك من جوا هتبقى ازاي قبل التشطيب ، وقرر لو هتضيف أو هتعدل أي حاجة قبل ما تبدأ زي إنك تفتح شباك أو تقفل بلكونة وغيرها من التغيرات.
2. قرر هتحط عفشك ازاي في كل أوضة عشان تقدر تقرر توزع الكهربا ازاي بدل ما تلاقي نفسك حطيت بريزة ورا الدولاب وجمب السرير مافيش.
3. ابدأ بتحديد نقط الكهربا المناسبة لعفشك ولو لسه مقررتش هتفرش شقتك ازاي حط نقط في كل حيطة واتأكد إن كلهم يكونوا في نفس المستوى واختار أماكن مفاتيح الكهرباء وتقسيمة الاضاءة وخلي عددها يكون مناسب لاحتياجك متزودش وخلاص عشان متعليش التكلفة.
4. وانت بتشتري الخامات اهتم باختيار خامات نظيفة وجودتها عالية علشان تتجنب أي أعطال داخلية بعد كدة.
5. وانت بتحدد نقط الكهربا متنساش انك تأسس للتكييف وللتليفون والدش حتى لو مش هتركبهم من الأول لكن دا هيوفر عليك تكسير بعد كده ويحافظ على الشكل العام بدل ما تكون الاسلاك ممدودة جوه الشقة.
6. بعد كده بندخل في السباكة للمطبخ والحمام وفي الخطوة دي ابدأ بتحديد أماكن الحوض، ومخارج المياه، والصرف الصحي، والسخان.
7. اتأكد وانت بتشتري خامات المواسير انها تكون نضيفة وجودتها عالية زي “اكواثيرم” و”بولي بروبلين” لأنها عملية جدا ومش بتصدي زي مواسير الزهر والحديد.
8. لو شقتك دور أرضي خلي الصرف عندك منفصل عن صرف العمارة علشان مع أول خلل في صرف العمارة المجاري هتبهدل شقتك.
9. العزل ثم العزل ثم العزل ودا لضمان عدم تسريب المياه أو التكسير مرة تانية.
10. بالنسبة للنجارة لازم تاخد مقاسات الباب والشباك وتحدد نوع وشكل الأبواب والحلوق في الشقة، واتأكد ان الحلوق خالية من الكسور والشقوق.
11. واتأكد من استخدام النجار للميزان لما يركب الباب علشان ميكونش في ميول بعد كده.
12. ندخل على المحارة ابدأ بتنظيف الأسقف والحوائط من مخلفات الصب.
13. جمع شرا ورفع الخامات في يوم واحد واستخدم الونش لأن ده هيوفرلك أكتر من استخدام العمالة.
14. ابعد الجبس عن ايد الصنايعي ودا لانه بيسهل الشغل عليه ويوفر في الوقت والمجهود لكن الجبس ضعيف وهش وقابل للكسر وبيحصل كوارث وعيوب كتير متعرفش تداريها بعد كده بالألوان والمعجون.
15. بعد ما تخلص المحارة بتجيب النقاش بيدهن حوائط الشقة كلها بالمعجون بسكينتين وبيمشي ويرجعلك تاني لما تخلص الأرضيات والسيراميك.
16. في تركيب الارضيات اتأكد من ان ميزان الأرض مظبوط وإن لحامات السيراميك تكون ماشيه مع لحامات الوزر.
17. تابع مع الصنايعي يوم بيوم علشان تتأكد انه بيركب صح لأنك ممكن تلاقي أخطاء زي انه السيراميك يكون مايل أو مش منتظم أو الرسمة مش مظبوطة.
18. بعد ما تخلص الأرضيات بيرجع النقاش علشان يبطن للون النهائي اللي انت اختارته بعد ما يعملك سكنية معجون كمان بعد الاتنين اللي اتكلمنا عليهم قبل كده وبعد كده الوش الأخير.
19. وأخيرا بتيجي مرحلة التشطيب النهائي زي إن الكهربائي بيركب غطيان البرايز، والمفتاح، والتابلوه الرئيسي والنجار بيركب الكوالين والأوكر والسباك بيقوم بتركيب الحوض، والخلاطات، والقاعدة وهكذا.
20. لو شايف إن التفاصيل دي كتيرة عليك انت بس قول جزر هتلاقي عندنا حلول مختلفة زي خدمة الاشراف نقدر نقوم بدالك بمتابعة كل الخطوات دي والتأكد من انها معمولة صح ومافيش أي عيوب قبل ما تستلم الشغل من أي صنايعي.وكمان ممكن تختار معانا التسليم على المفتاح وهنا احنا هنقوم بعمل كل شئ من أول التأسيس لحد ما تستلم شقتك وانت في مكانك مرتاح.
تاريخ الاضافة: Mar 31, 2020